Pas dy viteve të pandemisë , Tirana Pride u kthye në jetën publike për të kremtuar diversitetin, dashurinë, solidaritetin dhe ndjenjën e përkatësisë, të komunitetit dhe familjes. Nën mesazhin “Ne jemi familje”, organizatat LGBTIQ+ dhe aleatët, organizuan Javën e Krenarisë, e cila kulmoi me Paradën e Krenarisë, si aktiviteti thelbësor i kësaj jave në datën 21 Maj, Ora 11:00 te Sheshi Nënë Tereza.
“Ne jemi familje”, si slogani i këtij viti, përçon mesazhe të dashurisë familjare dhe rreket të ndërgjegjësojë mbi rëndësinë e familjes dhe diversitetit të saj.
“Ne jemi familje” sepse komuniteti jonë ndër vite është treguar resilient dhe solidar, duke i ofruar mbështetje njëri tjetrit pavarësisht lidhjeve të gjakut. Familja jonë mbështetet te dashuria dhe pranimi i njëri tjetrit pa kushte.
“Ne jemi familje” sepse familjet LGBT+ janë forma të padiskutueshme të familjes. Pavarësisht sulmeve publike, familjet tona ekzistojnë fuqishëm në realitetin social dhe si të tilla ushqehen nga dashuria dhe përkushtimi për njëri tjetrin, pavarësisht sfidave dhe sakrificave
1 Dekadë Paradë e Krenarisë
Këtë 10 vjetor, përveç aktiviteteve të tjerave, u organizua një ekspozitë emocionuese nga Aleanca LGBT e cila pasqyroi më së miri guximin dhe krenarinë e mbartur në vetvete nga gjithë aktivistët dhe pjesëtarët e komunitetit ndër vite.
