Xheni Karaj është një nga aktivistet e para të komunitetit LGBT+ në Shqipëri. Ajo është një ndër nismëtaret e lëvizjes LGBT+ në Shqipëri.
Qysh prej vitit 2009, Xheni së bashku me dhjetëra aktivistë kanë luftuar duke ndërmarrë aksione e fushata të ndryshme për të rritur ndërgjegjësimin për komunitetin LGBT+. Xheni është një aktiviste e cila vazhdon betejat për të drejta të barabarta për komunitetin LGBT+, por jo vetëm. Ajo është përfshirë gjithashtu në kauza të shumta dhe së fundmi ka ngritur zërin edhe kundër prishjes së Teatrit Kombëtar.
Që prej vitit 2012 ajo është një ndër organizatoret kryesore të Pride në Shqipëri. Xheni është drejtoreshë e organizatës “Aleanca LGBT” dhe ndër vite ka arritur të krijojë një hapësirë të sigurt për komunitetin. Gjithashtu ka arritur nëpërmjet Aleancës të sigurojë testime falas për sëmundjet seksualisht të transmetueshme dhe shërbim psikologjik falas për të gjithë ata anëtarë të komunitetit që kanë nevojë.